Mae Gwasanaeth Awtistiaeth Integredig Caerdydd a’r Fro yn cynnal fforymau 2 awr yn Llyfrgell Ganolog Caerdydd ar ddydd Llun cyntaf y mis. Nod y fforwm yw rhoi cyfle i oedolion awtistig gyfarfod a rhannu profiadau, yn ogystal â dysgu am wasanaethau lleol a derbyn gwybodaeth a fydd o bosibl yn berthnasol iddynt drwy siaradwyr gwadd. Mae rhai enghreifftiau o’r gwesteion sydd wedi dod atom ni i siarad yn cynnwys; Four Winds (elusen iechyd meddwl), MIND, Gwasanaethau Llyfrgell, Innovate (prosiect garddio) Gwasanaeth Lles a Gofal yn y Gymuned, a Chelfyddydau Cwm a Bro.
Dros yr ychydig fisoedd diwethaf, mae niferoedd fforwm Caerdydd wedi bod yn cynyddu ac mae oddeutu 20 o bobl yn mynychu bob un o sesiynau’r Gwasanaeth Awtistiaeth Integredig bellach. Yn sgil y cynnydd yn nifer y mynychwyr, mae’r Gwasanaeth Awtistiaeth Integredig wedi adolygu strwythur y fforwm ac wedi penderfynu gwneud yr ail awr yn llai ffurfiol, er mwyn cynyddu’r cyfleoedd i gymdeithasu. Roedd y Gwasanaeth Awtistiaeth Integredig yn obeithiol y byddai hyn gwneud i bobl deimlo’n fwy cyfforddus yn cymdeithasu ac yn rhoi hwb iddynt i sgwrsio mewn grwpiau llai o bobl.
Treialwyd y fformat newydd ym mis Mawrth 2020. Yn ystod ail awr y fforwm, rhannwyd yr ystafell i grwpiau llai o bobl. Bu pawb yn cymdeithasu am yr awr gyfan, ac ni wnaeth unrhyw un ddewis gadael. Gydag ychydig o anogaeth gan staff, fe wnaeth pawb yn yr ystafell siarad â’i gilydd.
Ers mis Tachwedd 2019, roedd grŵp bach o bobl (3-4) wedi bod yn cyfarfod yn Costa yn dilyn y fforwm (fodd bynnag, roedd pawb wedi derbyn cynnig i fynd gan aelod hyderus o’r grŵp). Yn dilyn fforwm mis Mawrth, rhoddwyd cynnig i bawb eto, a chytunodd 10 o bobl i fynd i Costa, gan gynnwys oedolyn awtistig a oedd wedi bod yn dawel iawn yn y fforwm ac yn gyndyn o siarad heb anogaeth gan staff.
